2Ti 2 | ETR | STEP | Nïe malöo, ugila negelasilo amoda nilï Geleso Yesuma dila nefolalebeweïe dibe ameada, dida hä amomadi gelola namialo.

2 Timothy 2

Dimodi e Geleso Yesuïe ami dolö gadoi namialoi amo

1 Nïe malöo, ugila negelasilo amoda nilï Geleso Yesuma dila nefolalebeweïe dibe ameada, dida hä amomadi gelola namialo. 2 Udia dolö yafiea nabaha sebegi, na ado säla olelei amolida diage nabi. Ado säi amoda, dia dolö asigi falagasei säla olelelo dawa gaui nefolalebe amolima säla ïaha namialo. Hobealada, iliage odoama säla olelemäiala helësëlahilä, säla ïmalo. 3 Geleso Yesuïe ami dolö hedabi gadoi nea, nilï neebe amo gadola, yöi diëgi, diage dofea, aso madela namialo. 4 Amala nea, ami dolöea ami hamoi hamosalea, ïe sigi aligilo neebe amo obeägïmäiala helësëlahilä, ea nagadaia namolö amoïeda asigia säosäola made nea, hamolo. 5 Amo gadola, balululo dolöea balululoïe mala dibe amo gadola made hamola, e baluluia baagila awäseda, bidi nelo amo gadola made nimolömelë. 6 Molö sagaloea baagi sëi hamoi hamoi amo gadola molö mumului dibe amo, hïdale nimolö dialea. 7 Na ado säsebeweli hedabola helësëmalo. Amala helësësa neëgida, dia dawadigisa maademäia ado säi amoïe mida, Dafidilo Geloia dima helësëlasimolömelë.

8 Yesu Geleso helësësa namialo. E bauia amila nowelasi amoge, amase, e Debidiïe mäu nelo amoge, helësësa namialo. Ado Mala Hedabi amo na olelesa neebe amoda amomelë. 9 Na Ado Mala Hedabi amo olelese amogida, ne së naha neawe. Nafade hamolo dolö igi ëfëa nafodolo amo gadola ne nafodoi neamelë. Amai gasoda, Godeïe adoda nafodoi made dialea. 10 Amaimo, udia dolö Godea memelei amoli helësëlahilä, damula auloge, namolöi namolö hedabi hïdo elöi amoge, Geleso Yesuma dibe amole, iliage gaula namiäia, yöi sulubadela diëgi, aso made dofeala nea, ne së naha neawe. 11 Ado dofäfalï amo nilïa nabaha maadei dibe amoda gowe.

Nilï ebalä baagoi galëda,
nilïge ebalä namolömelë.
12 Nilïa yöi diëgi, dofea, aso madela nea, së naha aligiseda,
nilïge sigi aligilo nea, ebalä sigi aligilo namolömelë.
Nilïa e baagi ïala, nilïda e sosogo made neala säseda,
eage nilï baagi ïala, dilida nïe made nebegola sämolömelë.
13 Nilï asigi falagasei made neëda,
ea ado säi amo bedefamolöi made neebe ameada, eda asigi falagasei wälamu namolömelë.

Dimodima dida Godeïe hamoi gelola hamosa namialola säi amo

14 Ado amoli dia udia dolöma helësëlasisamu namialo. Ilia ado eloalola nuduloea, dida Godeïe siigi nea, ilima idihë namialola sämalo. Ado eloalola säse amo, nabase amoli neala hedabolo made, nafadelasilomelë.

15 Godeïe siigi ïe hamoi hamolo nea, dia hamoi hamosebegoïe, ïe siigi hewala made, Godeïe ado mala dofä dibe amo gelolahilä, dofä hamosala helësëla, mogolafalï olelelo namialo. Godea dima obeägïlahilä, hedabola hamosa nelo gabula sämäia, amala hamosa namialo. 16 Amala neada, nagadaiaïe ado iso gäwi made nalï didiäha dibea ami aligila made, di nafolala gasi gala namialo. Ado amo gadoi ameada, Godema habola nagadaia galu helësëlo mala bäumolömelë. 17 Mala amo gadoiada äyo siwä aligila edelo amo gadola edemolömelë. Dolö äudä Haimeneasalea Filedasalea mala amo gadoi hamolo nea. 18 Elea ado dofä dibea amila asiala baagi feala asimelë. Elea sähaleada, Udia dolö nowelasimolö amoda, hä, nowelasisa maadeila sälahilä, udia dolö odoa asigi afädë negei amoli asigi neala balalëlasilo. 19 Amai gaso, nilï asigi afädë negemolö amoïe mida, Godea mosö igau gadoi sagasi amoda fologomolöi made, namolöi neamelë. ^{▼▼2.19aGodea mosö igau gadoi sagasila säi amoda, udia dolö Godea wela ifosisi nefolalebe amoli helësëla säi.} Ami ado äudä dëdëla negei dibe amogi, afädëda gowe. Dafidilo Geloia udia dolö hïle nefolalebe amolida hï dawadigisa maadei nea. ^{▼▼2.19b Nidei 16.5 bimalo.} Amase, elöda gowe. Afädëa sähalea, Neda Dafidilo Geloiïe neawela säseda, ameada, nafade difolalebe amolima baagi ïalahilä, dïgïla moholö dialeala dëdëla negei dialea.

20 Mosö edefadegi, falo elö elöla negelo amoligi, odoada goloeage silibaeage hamoi negelo. Amase, odoada iiage, nagaeage hamoi negelo. Falo odoaeada, hamoi odoa hamomolöïe memelela nafolala negelo. Amase, odoaeada segeyo sulubadelagi hamoi elö elöla hamomolöïe negelo. 21 Amai gabugi, afädëa mala nafade amoli fisila hï nigime hësa maadeseda, falo hedabi memelela nafolala negelo amo gadola, eda Godema odala ïala namolömelë. Ea ïe Dafidilo ugila negela hamoi hedabi sulubadela hamomolöi namolömelë.

22 Malïsä nefolalebe amolia asigia gesami aulo amo gadola made, dida fisäla awäla, asigi gagadelai amolia Dafidilo Geloia ili ugila negemäia welo nefolalebe amolibalä nea, di asigi mogoi namolöge, Godema asigi afädë negemolöge, boba hamomolöge, daluloge, amoli bua gaula bëgëla hamosa namialo. 23 Udia dolö odoaea asigi made gäwila, ado memalä amogi didiäha neebea ami made awäla, udia dolöea ado amo gadoia gëgëlola helësëlahilä, di ilibalä aligila made, nafolala namialo. 24 Amaimo, Dafidilo Geloiïe hamoi hamolo nefolalebe amolia gëgëmolöda dofea mademelë. Eada udia dolö nefolalebe sulubadelabalä hame negeloge, säla olelemolö dawa gauige, odoama habobala obëgëla made, ado geleä säloge, amo gadoi namolö dialeamelë. 25 Eada bafuäla sälo neebe amoli geleä aeasisila, hahamogilo namolö galea. Godea ili asigi besula, mala dofä dibe amo dawadigimolöïe fu ïmäia, amala hamosa namolö dialeamelë. 26 Ili asigi negela obëgëlahilä, dafidi mugabe busaea hamei dibe amo gadola hamomäia, ïe gei dilo amea ili gaui dilo amo, goome holola fisäla mosäiage, amo gadola namolö galeamelë.